Hans Wohlkopf †, Nordenham  
Alldag inne Wersermarsch

Elsfleth, Brook un Nornham
lirgt anne Werser ganz dicht dran.
Herkomen kanns mit Auto, Fohrrad orer Tog.
Arbeit gifft dat hier noog.

‚Kreis Wesermarsch‘ nömt sik dat Land,
un is för siene Industrie bekannt.
Hier boot se Schääpen, Flegers un noch mehr,
Jan Arbeitsmann, den freut dat sehr!

Dat Land is gröön, de Heven blau,
an‘t Woter kumms du jümmers gau.
De Diek bewohrt vor Storm un hoge Floot.
Versupen will hier nums, hett keene Not.

An‘ Strand von Broov, Tossens un E‘hörn
verhols du di mit diene Göörn.
Eenmol föhrt jedeen ok no guntsiet:
no Bremerhoben is dat nich ganz wiet!

In‘t Columbus-Center kanns du shoppen
ohn di de Hacken aftoloppen.
Utwanner- un ok dat Klimahuus
sünd beide ok een Hochgenuss!

Butjohrland heet us halve Insel,
de Molers molt mit fixen Pinsel,
Landschup, Siele, Watt un Meer,
de Fischerslüü, de Reithdackhüüs un noch vääl mehr.

An‘ „Golden Ring“, dat is de Diek,
wannert Schoop vun eene no de anner Siet.
Se pett‘ de Winnewuppsbulten dool,
all‘ns ohn Maschien – is dat nich ideol?

Hier lääv ik un bün hier geern to Huus,
weiht ok de Wind mol mit Gebruus.
De Luft is rein, dat Solt kanns smecken,
dat gifft nich vääle sokse Ecken!