Hans Wohlkopf †, Nordenham
De Elkeenmoorndoogblatt

Ganz bitiets stoh ik al up
un hol mi denn de Zeitung rup.
Wat steiht dor in’t Blatt:
Hund hett fungen eene Katt!

Man dor kanns du wat beleven,
sowat hett‘ noch nie nich geven!
Normol is: Katt suust in een Boom:
„Nu seht man to, wo’k runnerkoom!“

Is de Hund denn ganz wiet wech,
denkt de Pussie, nu is’t recht,
klattert von den Boom hendol.
Dat weer nich dat eerste Mol.

Den Steert piel in de Höchte,
spazeert se no de deepe Leegte.
Dor in’t Över huust veel Müüs,
in Harfst goht de ok in de Hüüs.

Tofräen un satt mokt Pussie sik up’t Padd,
drögt sik de Fööt fein up de Matt.
Mit schietig Fööt, dat litt der Herrschaft nich.
Dat gelt ok für Katten: Sauberkeit is Plicht!


Ik blöer de Zeitung um,
Dodesanzeigen ik dor funn.
Kiek up de Noom, nä, kenn ick nich –
un denn up’n Mol: Nä, dat gifft doch nich!

Hinnerk Bloom, leste Wääk noch risch un kuntant,
un nu up’n Mol up Kosters Kamp?
Weg mit dat Blatt un rin in‘ Goorn,
in de Rabatten kiemt al männig Koorn!