Nacht
Elfi N. Theis

Vorbei isch jetz de Dag un Nacht werd's alleweil.
Die dunkle Wolge ziehge schwarz iwwer's Städtl riwer.
Kon Mensch mehr unnerwegs, all Erwet ruht derweil
Un iwer alli Sorge legt sich die Nacht sacht driwer.

Do mechsch dei Auge zu un dricksch dein schwere Kopf
Gonz tief ins Daunekisse, schiebsch all Gedonke weg,
Wu dir noch weh du kennte, dricksch uf de Lichterknopf
Un Nach kummt iwer dich, umhillt dich wie e Deck.

Un jetz ghersch nimmi dir, s'isch alles wie en Droom.
Dein Kopf geht jetz spaziere weit weg vun deim Dehom.
Was Scheens, was Dunkls wuhnt in deiner Fantasie!

Un Morge werd's donn widder, de Dag kummt mit seim Licht
Un graue Sorge grawe longsom sich ins Gsicht.
Dein Droom hosch längscht vergesse wie e fremdi Melodie.